Si sielzeve
la stale plui clipute
el paròn disponibil,
che la meteve dute
par fà biele figure.

Al scovave la stale
cul bradass,
al voltave cun grazie
lis buiazzis
al cialave lis bestîs
cun braure
e ur faseve un biel jett
di mangiadure.

Tal zîr
di une miez'ore
si dave dongie
dutt el vicinât,
i pass,
cui lêns des zoculis
batevin el pedrât
in t'al sito de gnòtt.

Lis feminis
portavin un zei plèn
di cialzuss di comedà,
la gugie o la gurlete par filà
la lane de lôr piore.

I omps
cun t'un balett
di sarasine
si metevin in vore
a fa scovèss
no fruss
o levin dress
dentri la trombe
cu la dutrine
a fa finte di studià
par podè stà a scoltà
duç i discôrs dai granç.

Prime di dutt
lis racomandasiôns:
atêns ai furminâns,
par vie dal fucc,
a no piardi guselis
in t'al fèn
e pò bèn bèn
qualchi conte
di Toni Matt
o di Jacun dai Zeiss
ma nò, o spietavin lôr
lis contis dal "Orrôr"

Chês dai orcui,
des strîs
e chês dal diaul
platât dentri di un ciàn
o di un purcitt.

E lis contavin
che parevin veris
cui nôns des stradis
e chei dès croseris
e des personis
che lu vevin viodût.

E i muârs?
No sai cemût
e tornavin puntuai
dopo vot dîs
a zinglinà i ciardîrs
a bati cui saltei
simpri, si sà, tre voltis.

E che man frede,
e che man blancie
n'us corevin i sgrisui
jù pe schene
e no rivavin
nancie a tirà flât.

Ma ecco;
qualchidun s'inacuarzeve
ch'o jerin inmò lè
el dèt pontât
e màrs! Duç a durmè.

Jesus-Marie
tal jett ce tante pòre!

S'ingrumavin
ognun te nestre cove
senze coragio
di slungià iù i pîs
senze pandi peraule
ne pinsîrs
parsore il ciâf
tiravin sù la plète
t'es orelis
el ritmo de gurlete
e t'al linsûl
l'odôr dal antiûl. (???)